Tel Aviv, 16 Qershor 2025 – Izraeli është zgjuar sërish nën breshërinë e sulmeve raketore iraniane mëngjesin e sotëm, duke shkaktuar kaos dhe bilanc tragjik me të paktën pesë të vrarë. Sirenat e alarmit kanë vërshuar në mbarë vendin, ndërsa shërbimet e emergjencës përpiqen të menaxhojnë situatën e rëndë.
Në mes të kësaj krize, Ben-Dror Yemini, një gazetar i njohur izraelit, ka bërë një thirrje të fuqishme dhe të dëshpëruar për ndihmë ndërkombëtare, veçanërisht nga Shqipëria dhe Europa. Në një intervistë direkte për Euronews Albania, Yemini theksoi se Izraeli po përballet me një “rrezik ekzistencial” dhe se reagimi është i pashmangshëm.
“Përgjigja e vendeve evropiane është zero, kjo është ajo që e forcon regjimin iranian,” deklaroi Yemini, duke shprehur zhgënjimin e tij ndaj mungesës së një qëndrimi konkret nga shtetet evropiane. Ai kujtoi se më parë Franca dhe Gjermania kishin shprehur mbështetje për Izraelin, por tani duket se kanë tërhequr qëndrimet e tyre.
Gazetari izraelit ngriti zërin kundër asaj që ai e quajti “një vend që fle për shfarosjen e një vendi tjetër.” Pavarësisht ndryshimit të pozicioneve, ai beson se Europa është pro Izraelit në thelb, por thekson se “koha për hezitim ka mbaruar.”
Sulmet e sotme vijnë vetëm një javë pasi Agjencia Ndërkombëtare e Energjisë Atomike publikoi një raport që konfirmonte shkeljet e Iranit ndaj detyrimeve të tij ndaj OKB-së, duke lënë të kuptohet se tensionet do të përshkallëzohen.
“Gjasat janë që sulmet e Iranit të vazhdojnë. Jemi në kërcënim ekzistencial, jemi të detyruar të përgjigjemi. Shpresojmë dhe lutemi për një zgjidhje paqësore,” tha Yemini, duke shtuar, “Na duhet edhe mbështetja juaj se shumë herë përmendet marrëdhënie e mira mes Evropës dhe Izraelit dhe Evropa nuk mund të qëndrojë më, të ngurojë më, duhet bërë gjëja e duhur kundër këtij regjimi.”