“Padyshim se ardhja e tij në Kosovë dhe Ballkan lidhet me paqëndrueshmërinë e situatës së sigurisë, sidomos situata e fundit me Dodikun në Ballkan. Por më e rëndësishme se kaq është qëndrimi i Shteteve të bashkuara në këtë kohë përplasjesh të mëdha,” deklaroi Kolonel Afrim Veseli për Tv Dukagjinin, duke theksuar rëndësinë e mbështetjes amerikane në këtë kontekst.
Ish-zv.ministri i Brendshëm, Valdet Hoxha, e sheh vizitën si një vazhdimësi të angazhimit të NATO-s për sigurinë në rajon. “Me këtë vizitë shefi i NATO-s do të demonstrojë se nuk do të lejojnë asnjë hap të përshkallëzimit të situatës pavarësisht se çfarë statusi do të ketë NATO, nëse rimodelohet ajo. Vizita e Routte do të jetë konfirmim se Rusia s’ka çfarë kërkon këtu,” tha Hoxha, duke theksuar se “diplomacia e forcës” është tani në funksion.
Hoxha theksoi gjithashtu se zyrtarët e lartë amerikanë kanë përsëritur se nuk do të ketë lëvizje të trupave nga Kosova, duke ofruar një siguri të rëndësishme për stabilitetin e vendit.
Megjithatë, shqetësimet për kapacitetet ushtarake të Kosovës mbeten të pranishme. Kolonel Veseli kritikoi Ministrin e Mbrojtjes për mungesën e kapaciteteve të mjaftueshme, duke vënë në dukje disproporcionin midis forcave të FSK-së dhe atyre serbe. “Është utopike të mendohet se ne mund të mbrojmë veten. Ne kemi një popullatë shumë të papërgatitur ushtarakisht,” deklaroi Veseli, duke bërë thirrje për një përgatitje më të madhe ushtarake të popullatës.
Vizita e shefit të NATO-s në Kosovë shërben si një kujtesë e rëndësishme e sfidave të sigurisë me të cilat përballet rajoni. Mesazhet e fuqishme të dërguara gjatë kësaj vizite theksojnë nevojën për vigjilencë, bashkëpunim dhe përgatitje të vazhdueshme për të siguruar stabilitetin dhe paqen në Ballkanin Perëndimor.