Presidenti amerikan Donald Trump ka njoftuar në platformën Truth Social se ka zhvilluar një bisedë telefonike me homologun e tij rus, Vladimir Putin, e cila zgjati plot një orë e 15 minuta.
Gjatë kësaj bisede, dy liderët diskutuan sulmet e fundjavës të Ukrainës ndaj bazave të shumta ajrore thellë brenda territorit rus. Trump zbuloi se Presidenti Putin kishte deklaruar se do të ishte i detyruar t’i përgjigjej këtyre sulmeve.
Edhe pse Trump e cilësoi telefonatën si një “bisedë të mirë”, ai theksoi se ajo nuk do të çonte në paqe të menjëhershme. Kjo është hera e parë që presidenti amerikan flet me Putinin pas pak më shumë se dy javësh, pasi biseda e tyre e fundit telefonike u zhvillua më 19 maj dhe zgjati dy orë, të cilën Trump e kishte përshkruar si “të shkëlqyer”.