Tiranë – Policia e Tiranës ka sekuestruar rreth 500,000 euro dhe ka proceduar në gjendje të lirë pronaren e një pike këmbimi valutor, pasi dyshohet se ajo nuk ka deklaruar shuma të mëdha parash që depozitoheshin në subjektin e saj me qëllim huadhënieje me përqindje jashtë sistemit bankar.
Operacioni i koduar “Hidden Funds” (Fonde të Fshehura) u finalizua si rezultat i një hetimi të iniciuar nga Seksioni për Hetimin e Pastrimit të Parave dhe Aseteve Kriminale pranë Drejtorisë Vendore të Policisë Tiranë dhe i ndjekur nga Prokuroria e Tiranës. Shtetasja e proceduar është E. K., 72 vjeçe.
Sipas provave të mbledhura nga autoritetet, në subjektin në pronësi të 72-vjeçares depozitoheshin para të padeklaruara nga persona të ndryshëm. Këto shuma, dyshohet se përdoreshin më pas për aktivitete huadhënieje me përqindje, duke shmangur kështu sistemin bankar dhe duke krijuar një mekanizëm për pastrim parash.
Policia njofton se puna për identifikimin e personave të tjerë të përfshirë në këtë aktivitet kriminal po vazhdon, me qëllim dokumentimin e plotë të veprimtarisë së tyre dhe vënien përpara përgjegjësisë penale. Materialet procedurale i janë referuar Prokurorisë së Tiranës për veprime të mëtejshme ligjore.