Kryeministri i Mbretërisë së Bashkuar, Keir Starmer, i ka bërë një thirrje të fortë Presidentit amerikan Donald Trump që të distancohet nga çdo veprim ushtarak kundër Iranit. Starmer paralajmëroi për një “rrezik të vërtetë për përshkallëzimin e konfliktit” dhe theksoi rëndësinë e kërkimit të një zgjidhjeje diplomatike.
“Zgjidhja nuk është ushtarake, por diplomatike. Duhet të shmangim çdo veprim që mund të çojë në përplasje më të mëdha,” tha Starmer në deklaratat e tij publike, duke u bërë apel të gjitha palëve të kontribuojnë në këtë drejtim. Ai gjithashtu bëri të ditur se janë zhvilluar “shumë raunde bisedimesh me SHBA-në”, duke theksuar se kjo është “rruga e vetme për zgjidhjen e çështjes”.
Komentet e kryeministrit britanik vijnë vetëm pak orë para se ministri i Jashtëm britanik, David Lammy, të udhëtojë drejt Uashingtonit. Aty, ai pritet të takohet me Sekretarin amerikan të Shtetit, Marco Rubio, në një takim të planifikuar për mbrëmjen e së enjtes. Diskutimet do të fokusohen në situatën në Lindjen e Mesme dhe do të shqyrtojnë mundësitë për uljen e tensioneve në rajon.