Uashington D.C. – Kancelari gjerman Friedrich Merz mbërriti sot pasdite në Shtëpinë e Bardhë në Uashington D.C. për një vizitë zyrtare, ku u prit nga Presidenti i Shteteve të Bashkuara, Donald Trump. Kjo shënon takimin e parë mes dy udhëheqësve, me luftën në Ukrainë që pritet të jetë tema kryesore e diskutimeve.
Kancelari Merz, i cili mbërriti rreth orës 17:40, u prit me një shtrëngim duarsh tipik nga Presidenti Trump. Pas shkëmbimit të përshëndetjeve, takimi dypalësh filloi menjëherë.
Para fillimit të bisedimeve të plota, të dy liderët zhvilluan një konferencë të shkurtër me gazetarët në Zyrën Ovale. Kancelari gjerman shprehu falënderimet e tij për mikpritjen në Shtëpinë e Bardhë, duke theksuar se të dy vendet ndajnë një bazë të fortë për bashkëpunim. Nga ana e tij, Presidenti Trump shprehu besimin se do të ketë një marrëdhënie të shkëlqyer me Gjermaninë.
Duke iu referuar situatës aktuale globale, Presidenti Trump foli edhe për konfliktin në Ukrainë, duke e cilësuar “të trishtueshme” atë që po ndodh me Rusinë dhe Ukrainën.
Vëzhguesit politikë presin që takimi të theksojë rëndësinë e marrëdhënieve transatlantike në një periudhë sfidash gjeopolitike, me fokus të veçantë në koordinimin e përpjekjeve për të adresuar pasojat e luftës në Ukrainë dhe ndërtimin e një strategjie të përbashkët.