Uashingtoni ka ndërmarrë një hap të ri dhe të rëndësishëm në mbrojtje të lirisë së shprehjes. Departamenti Amerikan i Shtetit ka shpallur një politikë të re vizash që ndalon hyrjen në SHBA për zyrtarët e huaj që censurojnë qytetarët amerikanë në platformat e rrjeteve sociale.
Sekretari i Shtetit, Marco Rubio, deklaroi se çdo përpjekje nga jashtë kufijve të SHBA-së për të kontrolluar ose ndikuar në lirinë e shprehjes së qytetarëve amerikanë do të ketë pasoja diplomatike. Ai theksoi se është e papranueshme që zyrtarë të huaj të kërkojnë nga kompanitë teknologjike amerikane zbatimin e rregullave të censurës ose të kërcënojnë individë për përmbajtje të publikuar në SHBA. Rubio theksoi se “Liria e shprehjes është thelbësore për mënyrën amerikane të jetesës. Është një e drejtë e lindur, për të cilën qeveritë e huaja nuk kanë juridiksion.”
Kjo politikë vjen pas kritikave ndaj gjyqtarit brazilian Alexandre de Moraes, i cili bllokoi platformën X, dhe shqetësimeve për vendime të marra nga Gjermania dhe Britania e Madhe mbi kufizimin e përmbajtjeve në rrjetet sociale. Ajo përputhet gjithashtu me një trend në rritje të refuzimit të vizave për studentët e huaj të përfshirë në protesta, duke sinjalizuar një mbrojtje më agresive të lirisë së shprehjes nga SHBA.