Tiranë – Kryeministri Edi Rama ka mbledhur sot punonjësit e Bashkisë së Tiranës në një takim të jashtëzakonshëm, pas arrestimit të kryebashkiakut Erion Veliaj. Në fjalën e tij, Rama ka kritikuar ashpër protestën e disa prej tyre para GJKKO-së, duke e cilësuar si një “gabim” që nuk duhet të përsëritet.
“Disa nga ju shkuan edhe tek dera e GJKKO-së për të protestuar ditën që kryetari u la në burg, pa gjyq,” tha Rama, duke shtuar se e kupton “emocionin” e tyre, por se kjo protestë ishte një “gabim” që nuk duhet të përsëritet nga askush që punon për shtetin shqiptar.
Kryeministri ka theksuar se lejet e ndërtimit nuk janë “favore”, por një “e drejtë zhvillimi”, duke u përpjekur të qetësojë tensionet pas arrestimit të Veliajt, i cili akuzohet për korrupsion në lidhje me lejet e ndërtimit.
Rama ka premtuar se nuk do t’i lërë “pas dore” projektet e Bashkisë së Tiranës dhe se do të vazhdojë të mbështesë punonjësit e saj. Ai ka shprehur gjithashtu bindjen se drejtësia do të zbardhë të vërtetën dhe se Veliaj do të ketë mundësinë të mbrohet.
Ky takim vjen në një moment të vështirë për Bashkinë e Tiranës, pas arrestimit të kryebashkiakut Veliaj dhe akuzave për korrupsion. Kritika e Ramës ndaj protestës së punonjësve të bashkisë tregon shqetësimin e tij për perceptimin e publikut ndaj pavarësisë së institucioneve të drejtësisë dhe për imazhin e qeverisë.