Dy ditë pas ekzekutimit të Pavlin Prekës në Shkodër, hetimet ende nuk kanë dhënë asnjë rezultat konkret mbi autorin ose motivet e vrasjes. Grupi hetimor nuk ka mundur të përcaktojë pistat kryesore, ndërsa vrasja duket të ketë qenë e mirëorganizuar.
Sipas të dhënave të deritanishme, 20-vjeçari është qëlluar gjashtë herë në gjoks me armë me silenciator, duke bërë që askush të mos dëgjojë krismat. Viktima ndodhej i vetëm në shtëpi prej disa ditësh, pasi familjarët e tij ishin larguar në Dukagjin për t’u kujdesur për bagëtitë.
Hetimet dhe pistat e dyshuara
Policia ka marrë në pyetje familjarët, të afërmit dhe fqinjët e viktimës, por deri tani askush nuk ka dhënë informacione që mund të çojnë në zbardhjen e ngjarjes. Gjithashtu, nuk ka ende të dhëna nëse telefoni i viktimës është sekuestruar për të analizuar bisedat dhe kontaktet e tij të fundit.
Hetuesit po shqyrtojnë dy pista kryesore: të shkuarën e familjes Preka dhe aktivitetin e viktimës në zonën e Dukagjinit, ku ai qëndronte shpesh për të ruajtur bagëtitë. Policia dyshon se autori ka qenë i njohur për viktimën, pasi ka hyrë në oborrin e familjes pa u diktuar.
Mungesa e kamerave të sigurisë dhe fakti që askush në fshat nuk ka raportuar lëvizje të dyshimta e vështirëson edhe më shumë zbardhjen e ngjarjes. Xhaxhai i viktimës, i cili e gjeti i pari trupin e pajetë, ka bërë thirrje që autoritetet të intensifikojnë hetimet për të identifikuar përgjegjësit e vrasjes.
Në ditët në vijim, pritet që familjarët e Pavlin Prekës të japin dëshmi të reja, ndërsa hetimet do të vijojnë për të zbuluar nëse viktima kishte ndonjë konflikt në Dukagjin, një zonë e njohur për problematikat e saj, përfshirë kultivimin e kanabisit.
English