Në Forumin Ekonomik Ndërkombëtar që po zhvillohet në Tiranë, Presidenti francez Emmanuel Macron i ka bërë një thirrje të fortë komunitetit të biznesit ndërkombëtar për të investuar në Shqipëri. Ai shprehu optimizmin e tij të madh se vendi do të bëhet pjesë e Bashkimit Europian brenda dy viteve të ardhshme, duke e cilësuar këtë si një zhvillim kyç për stabilitetin e rajonit.
“Është mirë t’ju kesh në Europë! Ky është një vend stabël dhe i besueshëm. Mos i nënvlerësoni fuqitë,” deklaroi Macron, duke theksuar pozicionin strategjik të Shqipërisë si pikë hyrëse në Ballkanin Perëndimor, Mesdhe dhe Europë. Ai i inkurajoi investitorët të shfrytëzojnë këtë potencial, duke vlerësuar lidershipin e fortë të vendit. “Nuk flas vetëm se është miku im, por sepse ka sjellë rezultate. Në dy vitet që vijnë duke qenë se ka mandat të qartë, do të jenë pjesë e BE.”
Macron siguroi se Europa do të japë rezultate në procesin e integrimit, veçanërisht me linjëzimin e fortë mes Francës dhe Gjermanisë. Ai theksoi nevojën për besimin dhe investimet e sipërmarrësve për të realizuar agjendën ambicioze të kontinentit. “Ju lutem investoni në Evropë, besojini Evropës sepse kemi nevojë për besimin e investimet tuaja që të realizojmë agjendën kaq ambicioze se është e duhura.”
Presidenti francez riafirmoi mbështetjen e tij të palëkundur për anëtarësimin e Shqipërisë në BE, duke u shprehur si një “avokat” për mbylljen e këtij procesi deri në vitin 2027. Ai foli gjithashtu për një “Europë më të madhe” që përfshin Ballkanin Perëndimor, Mbretërinë e Bashkuar dhe Ukrainën, duke theksuar potencialin e kësaj hapësire me mbi 650 milionë banorë.
“Le t’i integrojmë edhe më mirë këto vende, le të punojmë së bashku për ekonominë, emigracionin, mbrojtjen, tregtinë,” tha Macron, duke argumentuar se integrimi i vendeve të qëndrueshme si Shqipëria forcon stabilitetin e gjithë kontinentit. Ai e cilësoi si një “mundësi unike” krijimin e një hapësire të respektuar me 700 milionë banorë.
Macron përmendi gjithashtu bashkëpunimin e Francës me Shqipërinë në fushën e arsimit përmes shkollës “42”, duke e vlerësuar këtë si një element shumë pozitiv të marrëdhënieve dypalëshe. Fjalimi i tij i fuqishëm ishte një mesazh i qartë mbështetjeje për Shqipërinë dhe një ftesë për investitorët ndërkombëtarë për të shfrytëzuar potencialin e këtij vendi në prag të integrimit europian.