Presidenti francez, Emmanuel Macron, ka zhvilluar një bisedë telefonike me homologun e tij iranian, Masoud Pezeshkian, ku shprehu “shqetësim të thellë” për programin bërthamor të Iranit. Macron theksoi se Teherani “nuk duhet të zotërojë kurrë armë bërthamore”.
Në një mesazh të publikuar në X, Macron bëri të ditur se Franca dhe partnerët e saj evropianë do të “përshpejtojnë negociatat” mbi çështjen bërthamore me Teheranin. Qëllimi është “dalja nga lufta dhe shmangia e rreziqeve më serioze”, veçanërisht në ditën e nëntë të konfliktit mes Iranit dhe Izraelit. “Jam i bindur se ka një rrugëdalje nga lufta. Për ta arritur këtë, ne do të përshpejtojmë negociatat e nisura me Iranin,” theksoi Presidenti i Elizesë.
Gjatë bisedës, Macron bëri thirrje gjithashtu për lirimin e Cécile Kohler dhe Jacques Paris, dy shtetas francezë të ndaluar në Iran që nga maji i vitit 2022, me akuza për spiunazh. “E përsërita kërkesën time: Cécile Kohler dhe Jacques Paris duhet të lirohen. Paraburgimi i tyre çnjerëzor është i padrejtë. Pres kthimin e tyre në Francë,” shkroi Macron.
Ndërkohë, Izraeli raportoi të shtunën se kishte goditur një central bërthamor në Isfahan dhe kishte vrarë tre komandantë të Gardës Revolucionare Iraniane, duke shtuar edhe më tej tensionet në rajon.