Vlorë, Shqipëri – Kadastra e Vlorës po vijon të jetë një prej institucioneve më të paqëndrueshme të administratës shtetërore në Shqipëri, duke fituar statusin e një “fuçie baruti” për shkak të ndryshimeve të shpeshta dhe të vazhdueshme në drejtimin e saj. Në vetëm gjashtë vite, rreth 15 drejtues janë larguar nga ky pozicion, duke lënë pas një gjendje të rëndë paqartësie dhe mungese transparence në menaxhimin e pronave.
Në këtë klimë tensioni dhe pasigurie, drejtimin e institucionit e ka marrë tashmë Genc Deromemaj, ish-kreu i Partisë Demokratike në degën lokale të Vlorës. Emërimi i tij vjen pas largimit të drejtuesit të mëparshëm, Erjon Galanxhi, i cili dha dorëheqjen pas vetëm 3 muajsh në detyrë. Pas dorëheqjes së Galanxhit, pozicioni u mbajt përkohësisht nga Paola Sulaj.
Ky është ndryshimi i tretë në drejtimin e Kadastrës së Vlorës vetëm brenda dy viteve të fundit, pas largimit të Ina Lucit dhe më pas të Ergys Skënderit, të cilët gjithashtu u tërhoqën nga ky pozicion. Para tyre, edhe Erdet Mandi u shkarkua nga Kadastra e Tiranës pas 5 muajsh në detyrë dhe u kallëzua për shpërdorim detyre.
Historia e paqëndrueshmërisë në këtë institucion është edhe më e theksuar. Në vitin 2019, brenda një muaji, tre drejtorë u larguan nga zyrat e Agjencisë Rajonale të Kadastrës në Vlorë. Florian Almadhi dha dorëheqjen në 9 shtator, duke u zëvendësuar nga Alteo Nazeraj, i cili nuk qëndroi as 10 ditë në detyrë. Në vend të tij u emërua Elona Hodaj, e cila gjithashtu dha dorëheqjen në 9 tetor. Arsyeja kryesore e këtyre largimeve ishte pamundësia për të zbatuar një vendim të Gjykatës së Lartë lidhur me një pronë në bregdet. Edhe një vit më pas, Kadastra ndërroi 7 drejtorë të tjerë, duke përfshirë Taulant Canametin dhe Andi Binaj.