Tiranë, 11 maj 2025 – Presidenti i Partisë së Lirisë, Ilir Meta, ka ushtruar të drejtën e tij të votës nga burgu, duke shprehur se procesi u shoqërua me pengesa për mediat. Meta pretendon se gazetarët u ndaluan të hynin në qendrën e votimit pasi u informuan se ai doli nga qelia i veshur me ngjyrat Kuq e Zi.
Në një mesazh të publikuar nga qelia, Meta shprehet: “Unë sapo votova sepse sot është një ditë historike për të gjithë ju dhe për Shqipërinë tonë! Në respekt të interesimit të mediave, që kishin kërkuar të ishin të pranishme, në procesin e votimit të Presidentit të Partisë së Lirisë, isha dakordësuar prej dy ditësh me administratën këtu, pas kërkesës së tyre, që të votoja sot pikërisht në orën 10:00, siç ishin njoftuar edhe mediat. Por sapo patronazhistët njoftuan se unë dola i veshur Kuq e Zi nga qelia e narkoregjimit, gazetarët nuk u lejuan të hynin në qendrën e votimit.”
Meta akuzon “kreun e organizatës” se “tmerrohet nga ngjyrat Kuq e Zi” dhe se ato i kujtojnë atij “mbrojtjen e Kushtetutës” dhe “mbrojtjen e kufijve të Kosovës”. Ai gjithashtu pretendon se “ka tmerr edhe nga pamjet live të Ilir Metaj sepse ka tmerr nga vota e lirë dhe liria e shqiptarëve.”
Në mesazhin e tij, Meta u bën thirrje “të gjithë shqiptarëve patriotë dhe kuqezinj” që të votojnë, duke theksuar se “ndryshon vetëm ai popull që lufton dhe voton”. Ai e përfundon mesazhin me fjalët: “Ne jemi popull shqiponjash dhe sot është koha për ta dëshmuar si kurrë më parë!”
Ky incident ka ngjallur reagime të ndryshme, me mbështetësit e Metës që e shohin atë si një përpjekje për të penguar transparencën dhe për të kufizuar lirinë e medias, ndërsa kundërshtarët e tij nuk kanë dhënë ende ndonje koment.