Tiranë – Ilir Meta, kreu i Partisë së Lirisë, ka reaguar ashpër nga burgu lidhur me zgjedhjet e 11 Majit, duke theksuar se ato ishin një “farsë elektorale” e dënuar nga organizata politike më e madhe në botë, IDC-CDI. Sipas Metës, 108 parti anëtare të kësaj organizate e kanë rrëzuar legjitimitetin e këtij procesi.
Meta theksoi se zgjedhjet e fundit ishin “të kriminalizuara” dhe nuk përmbushën asnjë standard ndërkombëtar, duke shkelur “dhunshëm kriteret e Kopenhagenit”. Ai shprehu mbështetjen e tij të plotë për rezolutën e IDC-CDI, e cila dënon manipulimin e procesit zgjedhor “përmes kapjes së shtetit dhe bashkëpunimit kriminal në frikësimin e votuesve dhe manipulimin e rezultateve”. Meta përmendi gjithashtu “përndjekjen gjyqësore ndaj liderëve të opozitës” dhe “pandëshkueshmërinë institucionale ndaj krimeve zgjedhore”.
Në deklaratën e tij, Meta vlerësoi lart mesazhet e qarta të IDC-CDI për domosdoshmërinë e zbatimit urgjent të rekomandimeve prioritare të OSBE/ODIHR. Ai theksoi rëndësinë e ndërprerjes së përndjekjes politike, rikthimit të të drejtave të plota për liderët e opozitës dhe krijimin e një qeverie teknike, sipas modelit të Maqedonisë së Veriut. Kjo qeveri, sipas Metës, duhet të mbikëqyrë reformat drejt BE-së dhe të përgatisë zgjedhje të reja.