Gaza – Situata në Rripin e Gazës mbetet alarmante, me një rritje të ndjeshme të numrit të viktimave gjatë 48 orëve të fundit. Sipas Ministrisë së Shëndetësisë së Gazës, e drejtuar nga Hamasi, sulmet izraelite kanë shkaktuar vdekjen e 202 personave dhe plagosjen e 1,037 të tjerëve në këtë periudhë.
Zyrtarët shëndetësorë raportojnë gjithashtu se 450 banorë të Gazës janë vrarë pranë vendeve të shpërndarjes së ndihmave, ndërsa të paktën 3,466 të tjerë janë plagosur në këto zona.
Që nga përfundimi i armëpushimit në mars, numri i përgjithshëm i viktimave ka arritur në 5,599 të vdekur dhe 19,097 të plagosur.
Shifrat e përgjithshme, të raportuara nga gazeta izraelite Hareetz, tregojnë se që nga fillimi i luftës më 7 tetor 2023, numri i të vdekurve në Gaza ka arritur në 55,908, ndërsa i plagosurve në 131,138. Këto të dhëna nënvizojnë thellësinë e krizës humanitare dhe konfliktit të vazhdueshëm në rajon.