Ekonomia shqiptare ka shënuar një rritje prej 4,1% deri në fund të tremujorit të tretë të vitit të kaluar (2024), sipas të dhënave të fundit nga Banka e Shqipërisë (BSH). Në raportin e saj të Stabilitetit Financiar për gjashtëmujorin e dytë të 2024, BSH thekson se kjo rritje ka qenë e gjerësisht e bazuar nëpër sektorë të ndryshëm.
Motorët kryesorë të kësaj rritjeje kanë qenë konsumi i fortë, investimet e shtuara dhe performanca e shkëlqyer e sektorit të turizmit. Paralelisht me rritjen ekonomike, vendi ka shënuar ulje të papunësisë dhe rritje të punësimit dhe pagave.
Politika fiskale ka ruajtur një prirje konsoliduese falë rritjes së ndjeshme të të ardhurave fiskale. Ndërkohë, presioni inflacionist ka ardhur në rënie, duke i dhënë Bankës së Shqipërisë hapësirë për të lehtësuar politikën monetare.
Veprimtaria financiare në vend ka vijuar të jetë e qëndrueshme. Depozitat dhe kreditë janë zgjeruar, pavarësisht efektit të mbiçmimit të kursit të këmbimit. Kapitalizimi i veprimtarisë bankare ka mbetur në nivele të mira, ndërsa fitimi i bankave është përmirësuar ndjeshëm.
Megjithatë, Banka Qendrore paralajmëron se rreziqet për zhvillimet ekonomike dhe financiare mbeten prezente, kryesisht të lidhura me pasiguritë dhe ndikimin e zhvillimeve ndërkombëtare. Në këtë kontekst, BSH thekson rëndësinë e ruajtjes së rezervave financiare nga autoritetet publike dhe pjesëmarrësit e tregjeve për të siguruar funksionimin e mirë të veprimtarisë ekonomike.