Graz, Austri — Hetimet për sulmin tragjik në një shkollë të mesme në Graz, që la 10 persona të vdekur, përfshirë një vajzë nga Kosova, kanë zbuluar detaje shqetësuese. Policia austriake bëri të ditur se në banesën e autorit të dyshuar janë gjetur plane për një sulm me bombë, si dhe një bombë artizanale e papërdorshme. Gjithashtu, janë gjetur një letër dhe një video lamtumire.
Sulmi, i cili ndodhi të martën në shkollën e mesme “Dreierschützengasse”, konsiderohet si më vdekjeprurësi në historinë e afërt të Austrisë. Autori i dyshuar, një 21-vjeçar dhe ish-nxënës i shkollës, i dha fund jetës në tualetin e shkollës menjëherë pas sulmit. Deri më tani, autoritetet nuk kanë dhënë një motiv zyrtar për veprimin e tij.
Përveç 10 viktimave, sulmi la të plagosur edhe 11 persona të tjerë. Në nderim të viktimave, Austria ka shpallur tre ditë zie kombëtare, dhe flamuri austriak është ulur në gjysmë shtize në të gjitha institucionet publike. Zbulimi i planeve për bombë tregon se tragjedia mund të kishte qenë edhe më e madhe.