Deti Egje, 20 Maj 2025 – Anija shqiptare “Butrinti” P-134, pjesë e misionit të NATO-s në Detin Egje, ka finalizuar me sukses një operacion kërkim-shpëtimi (SAR), duke u ardhur në ndihmë 13 emigrantëve, mes të cilëve edhe 2 fëmijë.
Operacioni u zhvillua në bashkëpunim të ngushtë me Rojet Bregdetare të Greqisë dhe Turqisë, dhe përfundoi pa asnjë incident, duke dëshmuar efikasitetin dhe bashkëpunimin ndërkombëtar në misionet humanitare.
Ky shpëtim shënon operacionin e katërt SAR të kryer nga Forca Detare shqiptare në Egje gjatë vitit 2025, duke çuar numrin total të jetëve të shpëtuara në 111 persona. Angazhimi i Shqipërisë në këtë mision të rëndësishëm të NATO-s në Detin Egje është një tregues i kontributit të saj në menaxhimin e krizës së emigracionit dhe në ruajtjen e sigurisë detare.
Vazhdimi i këtyre operacioneve thekson rolin kyç që luan Forca Detare Shqiptare në këtë rajon strategjik dhe rëndësinë e bashkëpunimit ndërkombëtar për të adresuar sfidat humanitare.