Bogota, Kolumbi — Presidenti i Kolumbisë, Gustavo Petro, ka lëshuar akuza tronditëse, duke deklaruar se “junta e kokainës” ndërkombëtare, e cila përfshin edhe mafien shqiptare, po komploton kundër tij dhe ka tentuar të eliminojë rivalin e tij politik, Miguel Uribe. Petro theksoi se kjo është një hipotezë me “prova shumë të forta” dhe se “vrasësit kërkojnë të eliminojnë njëri-tjetrin, të dobësojnë shtetin dhe të forcojnë kontrollin mbi ekonominë e paligjshme.”
Sipas Petro-s, kjo “juntë” është një rrjet kriminal që drejton bizneset kryesore të paligjshme të kokainës në Amerikën Latine nga Emiratet e Bashkuara Arabe. Ai ka akuzuar prej kohësh se ky grup, i cili përfshin shtetas spanjollë, shqiptarë, meksikanë, italianë, kolumbianë dhe një paraguaian, ka lidhje të thella në politikën, Prokurorinë e Përgjithshme dhe Policinë në Kolumbi.
Në dëshminë e tij, Petro ka përmendur rreth 185 kandidatë zgjedhorë të vrarë në Meksikë dhe Ekuador, duke përfshirë edhe një kandidat presidencial, si pjesë e ofensivës së mafias për të marrë kontrollin e shtetit në Amerikën Latine. Ai pohoi se ka pasur katër atentate kundër tij që nga marrja e detyrës në gusht 2022, përfshirë plane për rrëzimin e aeroplanit presidencial dhe instalimin e snajperëve.
Një emër i theksuar nga gazeta franceze El Pais, që citohet të jetë në informacionet e presidentit kolumbian, është Dritan Gjika. Gjika, një shqiptar i arrestuar më 25 maj në Abu Dhabi, konsiderohet si një nga arkitektët kryesorë të zgjerimit të mafias shqiptare në Amerikën Latine. Ai akuzohet për trafik droge, pastrim parash dhe krim të organizuar, dhe besohet se ka luajtur një rol kyç në shndërrimin e portit të Guayaquil në Ekuador në një pikë kyçe për eksportin e kokainës drejt Evropës.
Ndër emrat e tjerë të përmendur si pjesë e kësaj “junte” janë Julio Lozano Pirateque, një tregtar zmeraldi me banim në Emiratet Arabe, Sebastián Marset, një trafikant droge i kërkuar nga Uruguai, dhe Alejandro Salgado Vega, i njohur si “El Tigre”, trafikanti më i kërkuar i drogës në Spanjë, që thuhet se fshihet në Dubai.