Tiranë — Prokuroria Speciale SPAK ka shpallur pretencën për tetë të pandehurit në çështjen e inceneratorit të Tiranës, duke kërkuar dënime të ndryshme për ta. Ish-ministri i Mjedisit, Lefter Koka, rrezikon një dënim prej 4 vitesh burg për shpërdorim detyre të kryer në bashkëpunim.
Së bashku me Kokën, SPAK ka kërkuar dënimin me 4 vite burg edhe për Bledar Karolin, Fatjon Muratin, dhe ish-zyrtarët e Bashkisë së Tiranës, Taulant Tusha dhe Namik Simixhiu.
Për Valbona Ballgjinin dhe Sidita Koplikun është propozuar një dënim me 4 vite shërbim prove, ndërsa Jetmir Llapaj rrezikon 2 vite burg.
Dënime të reduktuara dhe masa shtesë
Duke qenë se të pandehurit kanë zgjedhur gjykimin e shkurtuar, në rast se shpallen fajtorë, dënimet e tyre do të ulen me një të tretën. Si masë plotësuese, SPAK ka kërkuar që të pandehurve t’u hiqet e drejta për të ushtruar funksione publike për 5 vite.
Ndërkohë, në një proces të veçuar, po gjykohen ish-zyrtarët Etleva Kondi, Alba Thoma, Pëllumb Abeshi dhe Silena Tola.
Akuzat dhe hetimet e SPAK
Sipas prokurorisë, ish-ministria e Mjedisit kishte komunikim të hershëm me kompaninë e Klodian Zotos dhe Mirel Mërtirit, të cilët konsiderohen pronarët faktikë të inceneratorit të Tiranës. SPAK pretendon se koncesioni për ndërtimin e inceneratorit është dhënë në mënyrë të parregullt, pasi kompania ka bërë një propozim të pakërkuar dhe ka përgatitur vetë studimin e fizibilitetit, i cili më pas është pranuar nga komisioni pa analiza të plota.
Një nga problemet kryesore të identifikuara është mosllogaritja e të ardhurave nga dheu i nxjerrë gjatë procesit, që mund të kishte sjellë përfitime të mëdha për kompaninë, duke i shkaktuar dëm buxhetit të shtetit.
Bosët në kërkim
Mirel Mërtiri dhe Klodian Zoto, të cilët konsiderohen si drejtuesit në hije të këtij projekti, janë shpallur në kërkim, ndërsa hetimet për përfshirjen e zyrtarëve të tjerë të lartë vazhdojnë.