Një valë e acartë dimërore ka përfshirë disa pjesë të Shteteve të Bashkuara, duke sjellë vdekje, shkatërrime dhe temperatura rekord. Stuhitë e ashpra, që kanë goditur pjesën lindore të vendit gjatë fundjavës, kanë lënë pas të paktën 10 viktima, ndërsa miliona amerikanë po përballen me kushte të vështira atmosferike.
Kentaki u godit më rëndë nga vërshimet e shkaktuara nga shirat e dendur, duke shkaktuar 9 vdekje. Guvernatori Andy Beshear njoftoi se ekipet e shpëtimit kanë nxjerrë nga uji mbi 1 mijë persona të bllokuar. Shumica e viktimave u mbytën kur makinat e tyre u bllokuan nga niveli i lartë i ujit, duke përfshirë një nënë dhe fëmijën e saj 7-vjeçar.
Në Montana, Shërbimi Kombëtar Meteorologjik ka paralajmëruar për një “të ftohtë të rrezikshëm” të martën, me temperatura që pritet të zbresin deri në -51 gradë Celsius, të shoqëruara me erëra të forta. Meteorologët thonë se disa shtete do të përjetojnë stuhinë e dhjetë dhe më të ftohtë për këtë stinë, që po vjen nga drejtimi i Arktikut.
Alabama u godit nga tornado dhe stuhi të forta, që shkatërruan shtëpi mobile dhe dëmtuan infrastrukturën elektrike. Ndërsa në Atlanta, një person humbi jetën pasi një pemë e madhe ra mbi shtëpinë e tij.
Në Dakotën e Veriut, erërat e ftohta dhe temperaturat e ulëta pritet të zbresin deri në -50 gradë Celsius, duke mbajtur shtetin nën “paralajmërimin për acar”.
Qeveria Federale ka shpallur gjendjen e jashtëzakonshme në Kentaki, duke autorizuar Agjencinë Federale për Menaxhimin e Situatave të koordinojë përpjekjet e ndihmës. Autoritetet lokale dhe federale po punojnë për të ofruar ndihmë për të prekurit nga stuhitë dhe për të rikthyer normalitetin në zonat e prekura.
