Tiranë – Argita Malltezi, vajza e kreut të Partisë Demokratike, Sali Berisha, ka paralajmëruar se do të padisë analistin Baton Haxhiu. Kjo vjen pas deklaratës së Haxhiut në emisionin “Të Paekspozuarit”, ku ai shprehu besimin se ish-kryeministri Berisha nuk ishte i korruptuar, por se “dy fëmijët e tij kishin bërë namin”.
Në një reagim të fortë në rrjetet sociale, Argita Malltezi e ka cilësuar Baton Haxhiun si “mjelësin e parave të shqiptarëve nëpërmjet inceneratorëve dhe parave të korrupsionit të Edi Ramës”, duke e krahasuar me Adriatik Doçin dhe Karlo Bollinon. Ajo theksoi se Haxhiu, sipas saj, kreu “shërbimin e radhës ndaj Ramës” duke e akuzuar për korrupsion pa ofruar asnjë provë.
Akuzat e Malltezit: Gënjeshtra dhe Shërbim ndaj Qeverisë
Malltezi sfidoi Haxhiun të mbledhë prova për deklaratat e tij dhe t’i paraqesë ato në gjykatë. “Haxhiu nuk përmendi asnjë rast për korrupsionin, që shqiptarët të dinin për çfarë e kishte fjalën, sepse edhe ai e di që deklaratat e tij janë fund e krye gënjeshtra,” shkroi ajo.
Më tej, Malltezi akuzoi Haxhiun se ishte “aset i UDB-së” në Hagë dhe se paratë e inceneratorëve dhe pagesat nga Edi Rama i kanë zënë sytë dhe veshët. Ajo e quajti Haxhiun jo thjesht një “ushtar”, por një “fenomen gjobëvënieje”, duke e lidhur atë dhe figura të tjera si Doçi e Bollino me “narkoshtetin e Ramaduros”. Sipas saj, këta persona “ditën fryhen me para publike dhe natën mashtrojnë për llogari të pagatorit të tyre dhe për të kamufluar krimet e këtij të fundit.”
Reagimi i Argita Malltezit pritet të ndezë një tjetër debat të ashpër mes palëve, duke e çuar çështjen në gjykatë.