Tiranë, Shqipëri – Pas shitjes së rrjetit të supermarketeve SPAR te Viva Fresh nga Kosova, Balfin Group i Samir Manes ka finalizuar shitjen e një tjetër kompanie të madhe. Këtë herë bëhet fjalë për Fashion Group Albania, e cila tashmë i kalon në pronësi kompanisë kosovare ALBI HOLDING SHPK.
Lajmi u konfirmua nga Autoriteti i Konkurrencës, i cili njoftoi se ishte depozituar “Njoftim paraprak, me anë të së cilës është njoftuar lidhur me transaksionin e propozuar të përftimit të kontrollit të shoqërisë Fashion Group Albania SHPK nga shoqëria ALBI HOLDING SHPK.”
Fashion Group Albania është një nga emrat kryesorë në shitjen me pakicë të veshjeve dhe aksesorëve në Shqipëri. Si pjesë e Balfin Group, kjo kompani zotëronte ekskluzivitetin për një sërë markash ndërkombëtare të njohura si Prenatal, Springfield, Geox, Aldo, Women’Secret, Okaidi, Mango, Parfois, Carpisa dhe Cortefiel.
Kjo shitje e dytë e rëndësishme brenda një periudhe të shkurtër kohore, pas transaksionit të SPAR-it për 44 milionë euro, tregon një strategji të re të Balfin Group për të ristrukturuar portofolin e aseteve të saj. Ndërkohë, hyrja e kompanive kosovare si Viva Fresh dhe Albi Holding në tregun shqiptar, sidomos në sektorin e shitjes me pakicë, sinjalizon një forcim të investimeve rajonale dhe një dinamikë të re në peizazhin ekonomik të të dy vendeve.