Rodos, Greqi – Një 22-vjeçare shqiptare është arrestuar në portin e Rodosit, menjëherë pas mbërritjes me traget nga Pireu, pasi u kap me një sasi të konsiderueshme kokaine të fshehur në valixhen e saj. Ngjarja ka ngjallur dyshime për përfshirjen e saj në një rrjet më të gjerë të trafikut të drogës.
Sipas raportimeve të mediave greke, e reja shqiptare nuk ka bërë rezistencë gjatë momentit të arrestimit nga autoritetet portuale. Gjatë kontrollit të imtësishëm të bagazheve të saj, oficerët zbuluan dhe sekuestruan 2.248 gramë kokainë. Përveç lëndës narkotike, në valixhe u gjetën edhe një pistoletë 9 mm, 49 fishekë dhe 1.300 euro para kesh.
Aktualisht, 22-vjeçarja ndodhet në paraburgim dhe pritet të dalë nesër në mëngjes para Prokurorisë së Rodosit. Aty do t’i komunikohet zyrtarisht akuza për trafik të lëndëve narkotike dhe armëmbajtje pa leje.
Hetimet e autoriteteve greke vazhdojnë me intensitet, me fokus në zbardhjen e plotë të rrjetit të trafikut të drogës pas këtij rasti. Po ashtu, po punohet për të identifikuar itinerarin e saktë që ndoqi droga, e cila besohet se kishte si destinacion ishullin turistik të Rodosit. Autoritetet kërkojnë të zbulojnë nëse pas kësaj ngjarjeje qëndron një organizatë kriminale e mirëfilltë dhe cilat janë lidhjet e 22-vjeçares me të.