Tiranë, 12 Qershor 2025 – Kryeministri Edi Rama ka reaguar ashpër ndaj Gjykatës së Tiranës, pasi kjo e fundit i ka rrëzuar padinë për shpifje ndaj ish-kryedemokratit Lulzim Basha, e ngritur në vitin 2018. Përmes një postimi në platformën “X”, Rama e cilësoi vendimin si “zhgënjyes” dhe “qesharak”, duke e krahasuar gjyqtaren Ëngjëllushe Tahiri me personazhin grotesk të letërsisë, Shvejkun.
Argumenti i gjykatës për rrëzimin e padisë, sipas Ramës, ishte se ai “s’ka pësuar ndonjë dëm, pasi dhe aktualisht mbaj detyrën e kryeministrit dhe deklarata [e Bashës] nuk ka ndikuar në perceptimin ndaj meje në publik”. Kryeministri e konsideroi këtë arsyetim si absurd, duke nënkuptuar se sipas gjykatëses, shpifja e Bashës nuk konsiderohet e tillë përderisa nuk e ka larguar Ramën nga detyra.
Rama shprehu indinjatën e tij për këtë “logjikë nën kapacitetin e një 12-vjeçari”, duke vënë në pikëpyetje profesionalizmin e gjyqtarëve, veçanërisht kur mendon për pagat e tyre të larta dhe pretendimet për rritje. Ai ngriti shqetësimin se si një sistem i tillë drejtësie mund të trajtojë çështje më të rëndësishme të qytetarëve të zakonshëm.
Gjyqtarja Ëngjëllushe Tahiri, e cila mori vendimin, është konfirmuar nga Komisioni i Pavarur i Kualifikimit në vitin 2023. Ajo ka shërbyer më parë në Gjykatën e Rrethit Krujë dhe në Njësinë e Shërbimit Ligjor pranë Gjykatës së Lartë. Vlen të përmendet se në vitin 2012, e njëjta gjyqtare liroi nga burgu djalin e deputetit socialist Rexhep Rrahja, pavarësisht kërkesës së Prokurorisë për dënim.