Pas marrjes së Ilir Metës dhe Monika Kryemadhit si të pandehur nga SPAK për dosjen CEZ-DIA dhe lobimin në SHBA, avokati i kreut të Partisë së Lirisë, Kujtim Cakrani, ka lëshuar akuza të forta, duke lënë të kuptohet se Ilir Meta nuk ka vepruar i vetëm dhe se emra të tjerë do të dalin në dritë. Cakrani deklaroi se zyrtarë dhe ish-zyrtarë të LSI (tashmë Partia e Lirisë) duhet të ishin marrë të pandehur dhe se “ky do të jetë procesi i shekullit”.
Sipas Cakranit, Lëvizja Socialiste për Integrim (LSI) kishte një grup parlamentar, deputetë, ministra dhe një Kryesi, të cilët mbajnë përgjegjësi direkte për lobimet, njohjet dhe pagesat në SHBA. Ai paralajmëroi se emrat e këtyre personave do të bëhen publikë, duke nënkuptuar se ata kanë firmosur dokumente dhe kanë njohje me çështjen e lobimit.
Kjo deklaratë ka ngritur menjëherë dyshime, duke vënë në qendër të vëmendjes emrin e Vangjel Tavos. Tavo, i cili ka qenë një figurë e rëndësishme e LSI-së, ka braktisur partinë dhe më pas i është bashkuar Partisë Socialiste, duke shërbyer si prefekt i Vlorës dhe duke kandiduar si kryebashkiak në Himarë, post të cilin e fitoi me mbështetjen e socialistëve.
Është pikërisht Vangjel Tavo një nga personat që Ilir Meta dhe LSI kanë akuzuar më parë në lidhje me lobimin në SHBA. Kjo ngre dyshime se kalimi i tij në krahun e socialistëve mund të ketë qenë i lidhur me nxjerrjen e dokumenteve që kanë çuar në kallëzimin e Metës në SPAK.
Ndërsa procesi ligjor pritet të jetë i gjatë dhe i ndërlikuar, deklaratat e avokatit Cakrani sugjerojnë se Meta mund të zgjedhë të zbulojë informacione të reja dhe të implikojë ish-bashkëpunëtorë të tij në përpjekje për të lehtësuar pozicionin e tij ligjor. Mbetet për t’u parë se cilët emra të tjerë do të dalin në dritë dhe si do të ndikojë ky zhvillim në peizazhin politik shqiptar.