GJKKO dënon Alqi Bllakon: 2 vite e 8 muaj burg për korrupsion në aferën e inceneratorëve
Gjykata e Posaçme Kundër Korrupsionit dhe Krimit të Organizuar (GJKKO) ka shpallur vendimin e saj për ish-deputetin e Partisë Socialiste, Alqi Bllako, duke e dënuar atë me 2 vite e 8 muaj burg. Ky vendim vjen pas akuzave për korrupsion pasiv të funksionarëve të lartë shtetërorë dhe të zgjedhurve vendorë, në lidhje me aferën e inceneratorëve.
Fillimisht, GJKKO e dënoi Bllakon me 4 vite heqje lirie. Megjithatë, për shkak të gjykimit të shkurtuar, dënimi u reduktua në 2 vite e 8 muaj burg.
Akuzat ndaj Bllakos përfshijnë dy raste të veçanta korrupsioni, të lidhura ngushtë me biznesmenin Klodian Zoto. Sipas prokurorisë, Bllako ka përfituar pagesa dhe favore të ndryshme nga kompania e Zotos.
- Njëra akuzë lidhet me një pagesë prej 120 mijë eurosh, të cilën Bllako e ka marrë nga kompania e Zotos, e cila kishte lidhje me fabrikën e birrës së babait të ish-deputetit.
- Akuzë tjetër, ka lidhje me ndikimin e Bllakos për punësimin e Klodian Zotos si këshilltar i jashtëm për Vladimir Bezhanin, një tjetër funksionar i lartë, duke abuzuar me detyrën e tij.
Prokuroria e Posaçme Anti-Korrupsion kishte kërkuar një dënim prej 5 vitesh burg për Alqi Bllakon, si dhe 5 vite qëndrim jashtë të gjitha funksioneve publike. Vendimi i GJKKO-së vjen si kulmi i një procesi gjyqësor që ka ngjallur interes të madh publik dhe ka vënë në qendër të vëmendjes çështjen e inceneratorëve.