Berisha: Miçigani do të ketë konsullatë, si mirënjohje për kontributin pro-Trump
Kreu i Partisë Demokratike, Sali Berisha, ka shprehur mirënjohjen e tij për diasporën shqiptare, duke theksuar rolin e tyre të rëndësishëm në mbështetjen e PD-së dhe në zhvillimin e Shqipërisë. Gjatë një takimi virtual me shqiptarët në diasporë, Berisha theksoi se do të bëjë gjithçka për të lehtësuar investimet e tyre në Shqipëri dhe për të rritur numrin e konsullatave shqiptare.
Një nga pikat kryesore të deklaratës së tij ishte njoftimi se Miçigani do të ketë një konsullatë shqiptare. Berisha e lidhi këtë vendim me kontributin e shqiptarëve në Miçigan në fitoren e ish-Presidentit Donald Trump.
“Ju garantoj se konsullatat, siç thashë edhe më parë, do të shumëfishohet numri i tyre dhe konkretisht Miçigani do ketë konsullatën shqiptare, edhe ndër të tjera, kontributin që ju dhatë në fitoren e presidentit Donald Trump,” tha Berisha.
Ai e konsideroi këtë kontribut të diasporës si një shtysë për të sjellë fitore dhe zhvillim për PD-në dhe Shqipërinë. Berisha shprehu besimin e tij se angazhimi i diasporës do të çojë në fitoren e PD-së në zgjedhjet e ardhshme.
“Ju falënderoj për ndërhyrjet tuaja, për mbështetjen tuaj shumë të çmuar dhe mbetem jashtëzakonisht entuziast dhe i bindur se ky kontribut dhe kjo energji e juaja po shndërrohet në fitore për PD-në dhe shqiptarët,” tha Berisha.
Ai gjithashtu theksoi se do të bëjë çdo gjë për të nxitur biznesmenët shqiptarë në diasporë të investojnë në Shqipëri, duke i konsideruar ata si një burim të rëndësishëm zhvillimi.