Në fshatin Goriçan të Beratit, babai i fermerit të arrestuar për shitjen e mandarinave me pesticide pretendon se i biri është i pafajshëm.
Hekuran Tafa, babai i Elton Tafës, shprehet se i biri nuk ka nxjerrë në treg mandarinat që u kthyen nga Kroacia për shkak të përmbajtjes së lartë të pesticidit fosmet (phosmet).
“Pse e arrestuan djalin? Pse e arrestuan djalin?” – shprehet ai i revoltuar.
“Nuk di gjë, se ai s’ka vrarë njeri, s’ka bërë asgjë, është i pafajshëm. Nuk di gjë, po të them,” shton ai.
Kush i ka shitur mandarinat?
“Unë nuk e pyes për asgjë atë (djalin). Shiten, nuk shiten, nuk e di, por them se është i pafajshëm. Shteti të nxjerrë të vërtetën. Nuk dimë gjë se çfarë është bërë me ato që u kthyen.”
Kush e ka fajin?
“S’di gjë! Të them kot!”
A është e vërtetë që janë me pesticide?
“Ato, po të ishin helmuese, ne do kishim vdekur të gjithë!”
Duke pretenduar se askush nuk e dinte se ky pesticid është i ndaluar, jashtë kamerave Hekuran Tafa tha se e kanë përdorur të gjithë fermerët.
Arrestimet dhe akuzat
Me urdhër të Prokurorisë së Beratit, sot u arrestuan:
- Arben Dyli – grumbullues, i akuzuar për shitje të produkteve të ndaluara.
- Elton Tafa – fermer, i dyshuar për shpërndarjen e mandarinave të kontaminuara.
- Elson Tahiraj – zyrtar, i akuzuar për shpërdorim detyre në lejet e tregtimit.
Ata akuzohen se kanë shitur në tregun vendas një sasi prej 10 tonë mandarinash, të cilat ishin destinuar për asgjësim pasi u kthyen nga Kroacia. Sipas analizave të kryera në Kroaci, ngarkesa kishte përmbajtje të lartë të pesticidit fosmet (phosmet), i dëmshëm për shëndetin e konsumatorëve.